بصيرة
بقلم/نشأت البسيوني
في وقت معين تلاقي إنك بقيت شايف حاجات ما كنتش شايفها قبل كده مش لأن الدنيا اتغيرت لكن لأنك أنت اللي بقيت أوعى وأهدى وأقدر تفهم اللي ورا الكلام واللي بين السطور
وتبدأ تلاحظ إنك ما عدتش تنخدع بسهولة ولا تتعلق بسرعة ولا تتأثر بأي كلمة زي زمان بقيت بتشوف الحقيقة حتى لو حاولت تتغلف وبتحس بالنوايا حتى لو ما اتقالتش
وتسأل نفسك امتى وصلت للإحساس ده امتى بقيت قادر تميز بين الصادق والمزيف بين القريب الحقيقي والقريب بالشكل بس بين اللي وجوده راحة واللي وجوده ضغط
ومع التفكير تفهم إن البصيرة دي ما جاتش بسهولة لكنها نتيجة تجارب كتير خيبات علمتك صدمات فوقتك مواقف خلتك تعيد حساباتك وأيام علمتك إن مش كل حاجة تتشاف بالعين
وتدرك إن البصيرة مش بس في رؤية الناس لكنها في رؤية نفسك كمان في إنك تعرف إمتى تمشي وإمتى تكمل إمتى تسامح وإمتى تبعد إمتى تقول آه وإمتى تقول لأ من غير تردد
وتلاحظ إنك بقيت أهدى في ردودك وأوضح في اختياراتك وأقل تعلق بالحاجات اللي ما تستاهلش لأنك بقيت شايف نهايتها من بدايتها.
وتفهم إن البصيرة بتختصر عليك طريق طويل بتبعدك عن وجع ممكن تعيشه وبتقربك من راحة تستحقها وبتخليك تعيش بوعي بدل ما تعيش بتجربة قاسية كل مرة
تدرك إن البصيرة مش رفاهية لكنها نعمة نعمة بتخليك تشوف الحقيقة حتى لو كانت صعبة وتختار الطريق اللي يناسبك حتى لو كان أصعب وتعيش حياة أصدق وأوضح من أي وقت فات
