أقوى اعتذار في وزارة التعليم.. لما الأب يربي طلبة المدرسة
كتب/ عبدالحق عبده
مما لا شك فيه ان التربية هى حصن لكل انسان اراد أن يرتقى فى عالم الدين والاخلاق والتربية هى مسئولية المجتمع من الاسرة الى المدرسة الى الشارع فيجب ان توجد مظاهر تربية الشارع بلستخدام القانون الرادع حتى نصل الى مصاف الدول المتقدمة التى اصبخ فيها القانون هو معلم من معالم التربية ويدرس القانون الذى يعتمد على السلوك مع المواطنين وايضا يتم وضع هذه المبادئ فى عقول ابنائنا من الصغر .
وسوف نعرض مشكلة داخل مدرسة وكيف تصرفت مديرة المدرسة فى العقاب لسلوك طالب سئ الخلق .
مديرة مدرسة اسمها أستاذة هاله قنديل مديرة مدرسة السادات الثانوية بنين في المحلة الكبرى.. عملت ت صرف بالنسبالي قوي جدا وصارم جدا ونادرا لما يتكرر في المدارس.. خاصة لما الطالب يرتكب سلوك سيء ومهين ضد المعلم وإدارة المدرسة.
= فيه طالب قيل إنه صوّر المُعلمة بتاعته في الفصل وهي بتشرح وتكتب على السبورة.. فيديو عادي لمدة ثواني.. ونشره على تيك توك.. وطبعا ده تصرف وسلوك سيء وانتهاك لخصوصية المعلمة واستخفاف بيها وبالمدرسة.
= المديرة عملت إيه.. فصلت الطالب أسبوع.. وعملت استدعاء ولي أمر.. وجابت الأب وابنه وطلبت منهم يقفوا وسط الطابور قدام كل الطلبة والمعلمين.. وقالت للأب: بعد إذنك ابن حضرتك يعتذر للمعلمة في الميكروفون قدامك وقدام كل الطلبة والمعلمين.. وحضرتك تعتذر عن تصرف ابنك ضد المعلمة وضد إدارة المدرسة.. فالاتنين اعتذروا.. والحقيقة الأب كان في قمة الاحترام والتأدب والأخلاق وظهر عليه الأسف الشديد بسبب موقف ابنه.
= وبعد الاعتذار.. المديرة مسكت الميكروفون وقالت: أنا رأفة بيك وبوالدك هكتفي بفصلك أسبوع مع اعتذارك وده تقديرا لموقف والدك.. وبقولها لك قدام الكل في الطابور وقدام والدك: لو اتكرر منك سلوك واحد تاني طول التلات سنين ملكش مكان في المدرسة وهيتحط في ملفك إنك سيء السلوك ومش هتدخل ولا كلية عسكرية.. والكلام ده ليك ولكل اللي واقفين في الطابور.. اللفظ السيء التصرف السيء فصل نهائي ويمشي تماما من عندي.. ويوم ما هتنفصل هتجيب ولي أمر يقف هنا يسمع قرار فصلك واعتذارك للمدرسة.. وده هيحصل مع الكل.. يا تلتزم يا هتحط نفسك وولي أمرك في موقف متلومش إلا نفسك عليه.. تحترم المدرسة ومعلميها هتتشال فوق راسنا.. غير كدة هتتحطط في نفس الموقف ده انت وولي أمرك.
= الموقف كان عظيم من الأب اللي كان مثالي ومحترم ومتربي مليون مرة رغم الإحراج اللي حصل لكنه مكنش سلبي وكان قمة في الإيجابية بعكس آباء كتير بيساندوا الابن ضد المدرسة ولو كانوا قمة في سوء السلوك.. لو حد هيقول شكرا لصرامة المديرة في التربية وصون كرامة وحق المعلمة.. أنا هقول مليون شكرا لولي الأمر اللي تحمل وقدم رسالة لابنه ولكل باقي زمايله: الغلط غلط وبلاش تحطوا أهاليكم في المواقف دي.
= كل ده كان سبب إن الابن يبقى واقف انتباه قدام والده والمديرة والمعلمين وزمايله.. بيعتذر علانية وبيسمع التحذير بمنتهى الحدة من المديرة.. والطلبة واقفين انتباه ولا واحد فيهم بيتحرك ولا بينطق من شدة وصرامة الموقف.. برأيكم الطريقة دي بتربي صح ولا بتكسر الطالب ووالده!.
