الشِعر
كل الناس
بتحب الشعر
وكل الناس
بتحاول تكتب
بس الشعر
يحب الناس
لو تقرا وتفهم
قبل ما تكتب
تعرف ان الشعر
بيوت بتطل على الإحساس
جسر بيوصل
بين السكر والأناناس
طير بيحوم
على عش عياله
ويصنع من جبروت الريش حراس
تفهم إن مدينة شوق الحرف
بتفتح باب للمنتسبين
لكن تدريس الأحلام
بيكون للحاصل
على تقدير ممتاز
حاول مش عيب
انك تلميذ يتعلم
ألف إحلم .. باء بكرة ..
تاء توصل ..
بعد إشارة وسور وعمارة
لأول فيصل
عند عصير الشوق والليل
ممكن توزن حمل جوافة
بريحة ذكرى وطين الترعة
وضحك عيال على شط نخيل
ممكن تفهم معنى التنوين
ف عيون المد سكون وزحام وهموم
وتفكك أجزاء التشكيل
تتعلم من رقصات النيل
الشعر مراكب
والصياد الشاطر
يرمي شباك الحرف
ويسرق من حبات النبض شعور
يمكن ضحكة
ويمكن دمعة
وبين الاتنين
بيعيش ف النور
واضح زي النجم
ف وسط الليل
ويسيب على ناصية كل طريق
وطريق قنديل
يسند صاحب
وقت الأزمة يشد الحيل
انا والشعر صحاب
من فترة وكان زعلان
شايف إن عيون البنت
مهيش أحزان
ولا تذكرة المترو
تودي باريس وميدان لبنان
وان القهوة مهيش حباية
ولحن غنايا وليل وصبايا
بترقص ف الفنجان
الشعر زمان ومكان
من غير عنوان
بيطير لفراغ الكون
ويشوف الناس
أوطان غير الأوطان
