بيت أحلامي
وانا بيت أحلامي
مهوش بحيطان بنور
أو سور بِــوْرود ..
من جبل النور
وجنينة ف شط قصور
مراجيح ولمون بيدور
ويدوَّخ أي عيال مفاعيص
أنا قلبي حريص
بيحوش من دقاته جنينة لبكرة
ومن محفظة الشوق أناشيد
وانا رمشي بخيل
بيوزع ع الشقيان من قوت الليل
وبيقفل كل حساب التسبيل
ويرد بحزم على التطبيل
وحيطان البيت من فتح حوار
والسقف جدال وشوية هزار
طب عامل إيه تلاتين مرة
وازاي الحال عشرين مرة
وف مرة تصادف نتحلَّى
بعصير الأيام المُرة
أنا بيتي إزاز ..
لكنْ مش مِتشاف
شفاف .. وبيكشف سر الشمس
وبيعكس طعم الحلم الحاف
وسعات خواف
من كسر عيال الطوب
وهروب للبعد التالت وقت غروب
لكن مضروب في الأرض
بحمل أساس
وجبال إحساس
أنا بيت أحلامي
مفيش ترباس
بيعطل حركة نقل الأنفاس
أنا زي الناس
بحلم بكتير
دنانير
ودهب وياقوت وبعير
لكن معنى البيت أكبر بكتير
البيت الناس الأهل
وعُمْر بيجري ورا عربية رش زمان
ويعدي .. أسرع م الدخان
أنا بيت أحلامي الأوطان
بيفصَّل من تريكوه الروح .. إنسان
بيت أحلامي, كلمات الشاعرة / شيماء حلمي
