ساعة الوعي
بقلم/نشأت البسيوني
في لحظة معينه الإنسان بيصحى مش من نوم لكن من غفلة يغيب عنها سنين يحس إن حاجات كتير كان شايفها غلط وإن ناس كتير كان معطيهم أكبر من حجمهم وإن مواقف كتير كانت بتستنزفه وهو كان فاكر إنها حب أو واجب أو لازم ساعة الوعي بتيجي من تراكم ومن وجع ومن خيبات صغيرة اتجمعت لحد ما قلبك قال خلاص مش قادر يخدع نفسه تاني ساعة الوعي ما بتحتاجش كلمة
ولا اعتذار ولا توضيح بتحتاج بس إنك توقف وتبص على كل اللي حواليك بعين جديدة بعين مشاعرك المنهكة علمتها وفي اللحظة دي الإنسان يلاقي إن اللي كان بيجري وراه ما يستاهلش وإن اللي كان بيحارب عشانه ما كانش بيحارب معاه وإن اللي كان بيدافع عنه قلبه كان أول واحد يتساب وإن اللي كان شايفه سند طلع بس عبء
وساعة الوعي بتكشف لك حقيقتك انت قبل حقيقة الناس تعرف
إنك كنت طيب أكتر من اللازم صبور أكتر من اللازم بتسامح بسرعة بتتعلق بسرعة وبتصدق بسرعة وتقول يمكن يتغير يمكن يفهم يمكن المرة الجاية تكون أحسن لكن بعد ساعة الوعي تعرف إن التغيير ما بيجيش بالغصب وإن الفهم مش واجب على حد وإن اللي ما حسش بقيمتك وانت موجود مش هيحس بيها وانت ماشي
ومن بعدها تمشي أخف أوضح وأنضج مش علشان اتغيرت فجأة
لكن علشان شفت الحقيقة من غير رتوش ومن يومها ما عدتش ترجع للي أوجعك ولا للي كسرك ولا للي استهان بقلبك ساعة الوعي
هي أول لحظة تبقى فيها نسخة صادقة منك نسخة صعب تتكسف
وصعب تتكرر
