( رهان ) بقلم أمل تاج
هاتلي ناس نيتها صافيه
هاتلي ناس مافيهاش عيوب
جنب شوك الصبر حافيه
خاليه من كل الذنوب
هاتلي حد اشكيله غلبي
انسى همي معاه وافضفض
هاتلي قلب افتحله قلبي
لما يسمعني يعيط
هاتلي ناس على راحتي تسهر
ناس تحلي مرار حياتك
للجميل ابدا ما تنكر
تفهمك حتى ف سكاتك
ناس بتوفي لما توعد
ناس تقدر ناس اصيله
عمرها عنك ما تبعد
تبقى جنبك وقت ميله
هاتلي ناس ضحكتها سهله
تبقى وقت الضلمه ضي
هاتلي ناس ف الغدر جاهله
الضمير جواها حي
هاتلي قلب يشيل جمايل
قلب مابيعرف يخون
وقت مااتعب يبقى شايل
فين مااكون لازم يكون
لو صادفت القلب الأبيض
ف الزمن ده اوعاك تسيبه
دا اللي وقت الشده يسند
دا اللي طيبة قلبه عيبه
لف كل الكون ودور
مش هتلقى وبرهان
هيه أسماك البحور
تسقي بعضيها حنان ؟
