اخر ما بينا كان الثقة
بقلم/نشأت البسيوني
كان فاكر إن أصعب حاجة ممكن تحصل بين اتنين بيحبوا بعض هي الفراق لكن بعد اللي حصل اكتشف إن في حاجة أصعب من الفراق بكتير وهي إنك تفضل واقف قدام الشخص اللي كنت بتأمن له قلبك وتكتشف فجأة إن في حاجات كتير ما كنتش تعرفها وإن الصورة اللي عشت جواها فترة طويلة ما كانتش كاملة وإن جزءا من الحقيقة كان مستخبي عنك لحد ما ظهر في لحظة واحدة وقلب كل الحسابات
كان بيحبها بطريقته وكان شايف إن وجودها في حياته مش مجرد علاقة عابرة كانت بالنسبة له مكان بيرجع له لما الدنيا تتعبه وصوتا بيحاول يسمعه وسط زحمة الحياة وشخصا كان بيحكي له عن تفاصيله الصغيرة قبل الكبيرة وكان فاكر إن اللي بينهم مبني على الصراحة وإن مفيش حاجة محتاجة تتخبى لأن اللي بيحب بصدق ما بيخافش من الحقيقة لكن اكتشافه لبعض الأمور اللي كانت بتعملها من وراه خلاه يقف مع نفسه ويعيد حساباته من البداية
في الأول حاول يكذب إحساسه وقال يمكن أنا فهمت غلط ويمكن الموضوع له تفسير ويمكن هي كانت خايفة تحكي ويمكن اللي وصل لي ناقص لكنه كل ما حاول يهرب من الحقيقة كانت التفاصيل بتقربه منها أكتر لحد ما حس فجأة إن الغمامة اللي كانت على عينيه بدأت تختفي وإنه لأول مرة بيشوف حاجات كان الحب مخليه يتجاوز عنها
ما كانش الوجع في اللي عرفه بس الوجع الحقيقي كان في السؤال اللي ضرب جواه مرة واحدة
هو أنا كنت فين طول الوقت
إزاي ما شفتش
إزاي كنت مطمن بالشكل ده
إزاي كنت بدافع عنها وأنا ما كنتش عارف كل الحقيقة
وقعد يفتكر مواقف كتير كان فيها قلبه بيقول له إن في حاجة غلط لكنه كان بيختار يصدق الحب بدل الشك وكان شايف إن الثقة معناها إنك ما تدورش ورا الشخص اللي بتحبه لكن اكتشف إن الثقة مش معناها إنك تعيش أعمى وإن الحب مش معناه إنك تلغي إحساسك وإن الإنسان لما يبدأ يحس إن في حاجات بتستخبى عنه لازم يقف ويسأل نفسه قبل ما يكمل
ومع كل حاجة عرفها كان جزء منه لسه بيحبها وده كان أصعب شيء لأنه لو كان فقد مشاعره كان الأمر هيكون أسهل لكنه كان لسه متعلق بالنسخة اللي عرفها منها وكان لسه فاكر ضحكتها وكلامها والمواقف اللي جمعته بيها وكان جواه حنين لأيام كان فاكر إنها حقيقية بالكامل
لكن الإنسان أحيانا بيكون محتاج يفرق بين حبه لشخص وبين قدرته على الاستمرار معاه لأنك ممكن تحب إنسانا جدا وفي نفس الوقت تعرف إنك مش قادر تكمل معاه وممكن تتمنى له الخير وأنت بعيد عنه وممكن تسامحه لكن ما تقدرش ترجع له نفس الثقة اللي كانت موجودة في البداية
ولما اتكلم معاها ما كانش عايز يعمل منها عدوا ولا كان عايز يجرحها بكلام قاسي لأنه رغم كل شيء كان فاكر إن بينهم عشرة وإن الإنسان لو اختلف مع شخص ما ينفعش يمسح كل الخير اللي كان موجود بينهم
قال لها أنا مش زعلان بس من اللي حصل أنا زعلان من الإحساس اللي جالي بعد ما عرفت حسيت إن في جزءا كبيرا من حياتنا أنا كنت عايشه وأنا مش عارف الحقيقة كاملة وحسيت إن الحب كان مخلي عيني مش شايفة وأنا مش قادر أعيش بعد كده بنفس الطريقة
حاولت تشرح وحاول هو يسمع لكن بعض الأشياء لما بتتغير صورتها جواك بيبقى صعب جدا ترجع تشوفها بنفس الشكل حتى لو سمعت ألف تفسير
قال لها يمكن أنا غلطت لما وثقت زيادة ويمكن أنت غلطتي لما خبيتي لكن أنا مش عايز أحول اللي بينا إلى حرب ولا عايز أخرج منك بكراهية لأنك كنت في يوم من الأيام أقرب إنسانة لقلبي
وبعد لحظة صمت طويلة قال لها الجملة اللي كانت أصعب عليه من أي كلام
خلينا أخوات وأصدقاء
قالها وهو عارف إن الجملة دي معناها إن الحكاية اللي كان بيتمنى تكمل لازم تقف عند حد معين وإن عليه إنه يتعلم يعيش من غير وجودها بالشكل اللي اتعود عليه وإنه لازم يقبل إن بعض العلاقات بتوصل لنقطة ما ينفعش بعدها تكمل بنفس الصورة
هي سكتت لأن الجملة كانت واضحة وما كانش فيها اتهام ولا تهديد ولا محاولة للانتقام كان فيها قرار هادي لكنه طالع من وجع كبير
هو ما كانش عايز منها حاجة غير الصراحة وكان يتمنى لو الحقيقة اتقالت له من البداية لأن الإنسان ممكن يتحمل الحقيقة مهما كانت صعبة لكنه بيتعب جدا لما يكتشف إن الحقيقة كانت موجودة طول الوقت وهو آخر شخص عرفها
ومن اللحظة دي بدأ يتعلم إن الحب مش مجرد كلام حلو وإن الاهتمام مش مجرد وجود وإن العلاقة الناجحة محتاجة أمان قبل أي شيء لأن الإنسان ممكن يعيش على قلة الاهتمام لكنه ما يقدرش يعيش مرتاح وهو شاكك في الحقيقة
وبدأ يفهم إن بعض العلاقات ما بتنتهيش لأن الحب مات لكن بتنتهي لأن الثقة اتكسرت وإن القلب ممكن يفضل يحب حتى بعد ما العقل يقول كفاية وإن ده مش ضعف وإنما طبيعة الإنسان
ومع الأيام بدأ الوجع يهدأ شوية بشوية وبدأ يكتشف إن قرار البعد ما كانش نهاية حياته وإن الإنسان لما يخرج من علاقة كانت بتتعبه بيحتاج وقت عشان يرجع يسمع نفسه من جديد ويعرف هو عايز إيه ويعرف إن راحته مش أقل أهمية من حبه لشخص آخر
ما حاولش يكرهها وما حاولش يفضحها وما حاولش يخلي الناس تاخد صفه لأنه كان عارف إن كل حكاية لها تفاصيلها وإن الكرامة أحيانا تكون في إنك تسكت وتخرج بهدوء
فهم إن بعض الأشخاص بيكون لهم مكان جميل في القلب حتى لو ما بقوش مناسبين للحياة وإن بعض الذكريات نحتفظ بيها من غير ما نرجع لها وإن بعض العلاقات الأفضل لها أن تتحول إلى احترام من بعيد بدل ما تتحول إلى كراهية قريبة
يمكن الحب بينهم ما كملش لكن لو قدروا يحافظوا على الاحترام يبقى في شيء جميل فضل موجود
لأن مش كل نهاية لازم تكون عداوة ومش كل خذلان لازم يتحول إلى انتقام ومش كل علاقة انتهت لازم نمسح منها كل شيء جميل
أحيانا يكفي إنك تقول
كنت حبيبتي وفي يوم كنت أغلى الناس عندي
لكن دلوقتي خلينا أخوات وأصدقاء
مش عشان الحب كان كذبة
لكن عشان الثقة لما اتكسرت خلت استمرار الحب بنفس الشكل أصعب من إنه يستمر
وفي النهاية الإنسان بيتعلم إن القلب محتاج حب لكن محتاج أمان أكتر وإن الصراحة ممكن توجع للحظة لكن إخفاء الحقيقة ممكن يوجع سنين وإن أجمل العلاقات مش هي اللي ما فيهاش مشاكل وإنما اللي ما فيهاش خداع وإن الإنسان مهما أحب لازم يفضل محتفظا بجزء من نفسه لنفسه لأن القلب غالي ومش كل شخص يعرف قيمته
وأحيانا يكون أكبر دليل على إن الإنسان نضج إنه يقدر يمشي من مكان كان بيحبه من غير ما يحمل معه كراهية وأن يقول وداعا لمن كان يوما أقرب الناس إليه وهو يتمنى له الخير لكنه في نفس الوقت يختار لنفسه حياة أكثر راحة ووضوحا وصدقا
