إعادة
بقلم/نشأت البسيوني
في لحظة غير متوقعة تحس إن كل حاجة محتاجة تتعاد من أول وجديد مش بنفس الشكل ولا بنفس الناس ولا بنفس الاختيارات لكن بنفسك أنت بنفس قلبك اللي تعب وبنفس عقلك اللي شاف كتير وبقى محتاج يبدأ بطريقة أهدى وأوضح وتبدأ تدرك إنك كنت ماشي بسرعة زيادة بتجري ورا حاجات كتير من غير ما تقف تسأل نفسك هو أنا رايح فين وليه وكنت بتاخد قرارات علشان تخلص
مش علشان ترتاح وكنت بتكمل علشان ما تقفش مش علشان مقتنع ومع الوقفة دي تلاقي نفسك بتراجع كل حاجة علاقاتك اختياراتك طريقتك في التفكير حتى نظرتك لنفسك وتكتشف إن في حاجات كتير محتاجة تتصلح أو تتغير أو حتى تتساب خالص وتفهم إن الإعادة مش ضعف ولا فشل لكنها شجاعة إنك تعترف إن الطريق اللي كنت ماشي فيه مش مناسبك وإنك عندك الحق تبدأ من نقطة
جديدة حتى لو متأخرة وحتى لو مختلفة عن اللي كنت مخطط له
وتاخد القرار الصعب إنك ما ترجعش لنفس الدواير ولا نفس الأخطاء ولا نفس الناس اللي استهلكتك وتقرر إنك تبني حياة أقرب ليك مش للي حواليك وتختار بعقلك وقلبك مش بخوفك أو احتياجك ومع كل خطوة تحس إنك بتفك عقد قديمة وإنك بتتخفف من حمل كان تقيل وإنك بتقرب من نفسك أكتر وبتفهمها
بوضوح وبتديها حقها في الاختيار والراحة وتلاحظ إن الإعادة ما بتمشيش بسرعة لكن بتمشي بثبات وإن كل حاجة بتتغير بهدوء من غير ضجيج لكن بتأثير حقيقي وإنك بتبني حاجة تعيش مش حاجة تعدي تفهم إنك ما بدأتش من الصفر لكن بدأت من خبرة وإن كل اللي عديت بيه كان بيجهزك للحظة اللي تقرر فيها تعيد كل حاجة بشكل يليق بيك وباللي بقيت عليه
